Gyda ddiolch i The Curry Guy am y rysait. Gallwch ddarllen y blog sy’n gysylltiedig gyda’r rysait yma.
- Dechreuwch trwy baratoi stoc y bakso. Rhowch yr esgyrn cig oen mewn sosban fawr a’u gorchuddio â dŵr. Dewch â’r cyfan i ferwi a’i fudferwi am 10 munud. Gwnewch yn siŵr eich bod yn sgimio unrhyw ewyn ac amhureddau eraill sy’n codi i’r brig, yna arllwyswch yr esgyrn i golandr mawr, gan daflu’r dŵr i ffwrdd.
- Golchwch yr esgyrn yn drylwyr, gan dynnu unrhyw weddillion gwaed ac ati a welwch ar yr esgyrn. Dychwelwch yr esgyrn i’r sosban a’u gorchuddio â 2.5 litr o ddŵr. Dewch â’r cyfan i fudferwi a pharhau i sgimio os oes angen. Ychwanegwch y winwnsyn, y shibwns, y sinsir, y garlleg, y goeden anis a’r sinamon. Gorchuddiwch a mudferwch dros wres canolig am o leiaf 3 awr.
- Tra bod y stoc yn mudferwi, paratowch y peli cig. Rhowch y briwgig cig oen mewn prosesydd bwyd a’i gymysgu’n bast trwchus. Ychwanegwch weddill y cynhwysion peli cig a pharhau i gymysgu nes eu bod wedi’u cyfuno’n drylwyr.
- Rhowch bowlen o ddŵr iâ ger y cymysgedd cig. Gwlychwch eich dwylo gyda’r dŵr oer a chydio mewn llond llaw bach o’r cig. Gwasgwch y cig rhwng eich bawd a’ch mynegfys nes bod gennych bêl maint pêl golff a’i thorri i ffwrdd. Trochwch eich dwylo yn ôl yn y dŵr a rholiwch y bêl gig hon yn eich dwylo nes ei bod yn llyfn ac yn grwn. Ailadroddwch gyda gweddill y cig a’i roi ar blât yn yr oergell nes bod y stoc yn barod.
- Pan fydd y stoc yn barod, hidlwch ef a thaflu popeth i ffwrdd, heblaw’r stoc, wrth gwrs. Golchwch y badell gyda dŵr ac arllwyswch y stoc yn ôl iddo. Dewch ag ef i fudferwi a’i sesno gyda halen a phupur gwyn at eich dant. Ychwanegwch y peli cig wedi’u paratoi.
- Bydd y peli cig yn suddo i’r gwaelod ac yna’n codi i’r brig ac yn arnofio ar ôl eu coginio. Os ydych chi’n ychwanegu pak choi, mudferwch hwnnw yn y stoc hefyd, ond nid yw hyn yn hanfodol gan y bydd yn coginio, beth bynnag, yn y cawl poeth.
- I weini, rhowch y vermicelli reis mewn powlen a’u gorchuddio â dŵr poeth. Gadewch i socian yn y dŵr am tua deng munud neu yn unol â chyfarwyddiadau’r pecyn. Hidlwch.
- Rhannwch y vermicelli reis rhwng 4 a 6 powlen. Rhowch y peli cig wedi’u coginio ym mhob powlen a’u gorchuddio â’r cawl poeth.
- Ychwanegwch bethau ychwanegol at eich dant. Taenwch y bakso gyda kecap manis a sambal tsili. Mae sialóts wedi’u ffrio yn gweithio’n dda hefyd.